سايق عليك النبى ما تقول كفاية يا شيخ الملحمة لما تخلص يبدا التاريخ و بكرة جاية حروب فيها لهب و صريخ و بكرة نصرك يخض الشمس من لهبه سايق عليك النبى ما تقول كفاية كده من النهاردة انتصاراتك هتبأة كده يا شعب مصر اللى رجالته و بناته كده حلال عليه لبن العصفورة لو طلبه سايق عليك النبى ما تقول كده كفاية افرح و كمل و ما تقولش كده كفاية الثورة دى بداية زى الهجرة و الميلاد الثورة دى بسملة كمل بأة الاية مع كل مرة قراية حسنها يزداد و الايه تجرى تسلم اختها الراية من غير نهاية و حتى الوقف مش معتاد و بكرة ايامنا تبقى حكاية و رواية عن ناس يباتوا حفايا ويصبحوا اسياد